Sunday

Horror Story Dead Never Lie ~ A Love Story part 13- Xstoryhindi

Rohan aur Ravi chounk par khade the.. Aman aur Shekhar ko unhone jaanboojh kar gali ke kone se hi was bhej diya.. khidkiyon ke andar lahra rahe parde, copper colour ka gate aur deewaron par puta rang.. sab kuchh Rohan ka jana pahchana sa tha.. isiliye thoda vichlit tha...

"yaar kisi na kisi ko toh bahar aana chahiye tha... pata nahi andar koyi hai bhi ya nahi...!" Rohan ne hatash hote huye kaha...

"aa jayega yaar.. yahan baithkar aaram se moongfali khata rah.. kabhi na kabhi toh Bhabhi ji dikh hi jayengi...." Ravi ne kaha... ek moongfali ki rehdi ke paas saamne wale ghar ke chabootre par dono baithe the...

Achanak ghar ke andar se aayi aawaj ne dono ko uchhalne par majboor kar diya...
"Neeru beti.. main market ja rahi hoon.. aakar darwaja band kar le...!"

"aayi mummy... jao aap.. main kar loongi.. jaldi aana.. mujhe tuition jana hai.." bahar baithkar aawaj par kaan lagaye baithe Rohan aur Ravi ko andaja lagane mein der na huyi ki baad mein aayi nihayat hi sureeli aawaj sirf aur sirf Neeru ki hi thi..," Yaar.. aawaj toh badi pyari hai.. bhagwan kare.. shakal bhi aawaj ke mutabik hi ho...!" Ravi ne dua ki...

"pata hai Ravi.. jab hum Batala ke liye chale the toh main sirf yahi soch raha tha ki ek baar sirf dekh kar aana hai.. ki mere sapne mein kuchh sachchayi bhi hai ya nahi.. Seriously Neeru se mujhe koyi lena dena nahi tha... par yaar.. yahan ki aabo-hawa, ye ghar.. ye chounk.. aur ye aawaj.. sab kuchh apna sa lag raha hai yaar.. aisa lagta hi nahi ki ye sab mere liye naya nahi hai... aisa lag raha hai jaise.. yahin par rahne lag jaaun.. ye aawaj sunta rahoon.. sach yaar.. mujhe yahan bahut apnapan mahsoos ho raha hai.. koyi toh baat hogi na..? wo bhi mera yunhi intjaar kar rahi hogi ya nahi? ... agar usne meri baat sun'ne se saaf mana kar diya toh...!" Rohan aankhon hi aankhon mein kahin aur hi khoya hua tha...

"abhi se itni lambi mat soch yaar.. dekh.. aunti ji aa rahi hain... ye hi teri sasu maa hai.. gour se dekh le.." kahte hi Ravi khada ho gaya aur sir jhuka kar dono hath jod liye," Namaste aunty ji!" Rohan ghabrakar palti maar gaya

"Namaste beta ji!" kahkar mataji ruk gayi..," kuchh kaam hai beta?"

"nahi.. bus auntyji.. yun hi.. aap bade hain.. bujurg hain hamare.. bus isiliye..." Ravi abhi bhi hath jode khada tha...

"bhagwan tumhara bhala kare beta.. jug jug jiyo!" kahkar mataji muskurayi aur aage badh gayi...

"oye.. marwayega kya saale..? aise kyun toka?" Rohan ne unke jate hi Ravi ko latad lagayi...

"he he he.. bhai.. main toh abhi se jaan pahchan kar raha hoon.. shadi ke baad bhabhi ji ko lene tumhare sath mujhe hi toh aana hai.. aur fir dekh.. aashirwad bhi mil gaya..!" Ravi ko rohan ki latad se koyi farq nahi pada....

"tu bhi ghamchakkar hai poora.. agar aaj Neeru nahi dikahyi di toh? inhone ab tera chehra bhi yaad kar liya hoga.. aaj ke baad mere sath yahan mat aana....!" Rohan ne gussa hote huye kaha....

"chhod na yaar.. aaj ke baad yahan aana hi nahi padega tujhe.. bahar hi milna bhabhi ji se.. ek minute.. main abhi aaya...." Ravi ne kaha aur darwaje ki aur badh gaya...

"oye Ravi.. marwayega kya? kahan ja raha hai..? wapas aa..!" Rohan hadbadakar khada ho gaya...

Ravi ne wapas mudkar batteesi dikhayi aur Rohan ki parwah na karte huye gate par pahunch gaya aur bell baja di....

Tabhi usko gate ki jhirriyon ke beech se ladki ke aa rahe hone ka ahsaas hua.. man hi man usne bhagwan ko yaad kiya aur gate khulne ka intjaar karne laga....

"haan ji.. tummmm?" Haan ji sirf ladki ne bola tha.. par 'tummmm' dono ke munh se ek sath nikla... Ravi do kadam pichhe hat gaya.. Darwaje par Ritu khadi thi.. wahi patli aur lambi sundar si ladki jiske sath Ravi ki bus mein aur fir car mein muthbhed huyi thi.....

"aa.. a.. haanji.. par aapka naam toh Ritu hai na?" Ravi boukhlate huye bola...

"haan.. toh? yahan kya lene aaye ho..? tumhe kaise mila ye ghar..." Ritu ne tunaktee huye apne dono hath kulhon par jama liye....

"wwo.. hum toh.. aise hi aa gaye the ji.. bhatakte huye.. maaf karna.. par wwo.. kahan hain?" Ravi ne girte padte apni baat poori ki....

"wo koun? tumhe chahiye kya?" Ritu ki aawaj tej hokar ab Rohan ke bhi kaano mein padne lagi thi....

Ritu ke gusse se bolte rahne ke karan Ravi abhi tak sambhal nahi paya tha..," wwo.. bbhh.. bhabhi ji!"

"koun bhabhi ji.. ? tumhara dimag kharab hai kya? yahan koyi bhabhi ji nahi rahti... tum aakhir aaye kya lene ho?" Jaise hi Ritu ne usko khari khari sunate huye apna hath aage kiya.. Ravi ko gajab ka bahana mil gaya," hamara fone! oye Rohan.. aaja.. mil gaya tera fone.. mera shak sahi tha.. inhone hi churaya hai.. shakal se hi pata lag raha tha... ki inhi ka kaam hai?" Ravi ab usko hawi hone ka mouka nahi dena chahta tha..

"fone?" Rohan ki samajh mein abhi tak nahi aaya tha ki wo kisliye gaya tha aur ab kya bak raha hai.. par Ravi ke bulane par wah mann hi mann usko galiyan deta hua gate par hi pahunch gaya," kya hua?"

"are.. tera fone.. ye dekh iske hath mein..!" Ravi Ritu ke hath mein Rohan ke jaisa fone dekh uske sir par chadhne ko utaaru ho gaya...

ab hadbadane ki bari Ritu ki thi.. iss tarah se khud par gali mein iljaam lagte dekh wah hadbada gayi..," hamein toh ye.. bus mein mila tha...!" Ritu ki najrein jhuk gayi...

"achchha.. bus mein mila tha.. bus mein toh main bhi baitha tha... mujhe kyun nahi utha layi tum.. bolo.. kah deti mil gaya tha bus mein...!" Ravi lagataar uske sir par chadhta ja raha tha...

"chup bhi kar yaar ab.. itna bolne ki jarurat kya hai?" Rohan ne usko shant karne ki koshish ki....

"kyun na bolun main? ghar aaye mehmaan ko pani poochhna toh door.. ijjat utarne par utar aayi ye...! isko toh ye bhi yaad nahi raha ki kaise maine inko lift dilwayi thi...." Ravi ki aawaj aur oonchi ho gayi....

"aa..aap pls andar aa jayiye.. yahan tamasha kyun kar rahe hain..?" Ritu ne poori najakat ke sath kaha....

"nahi.. hamein nahi aana... " Ravi bol hi raha tha ki Rohan ne usko pichhe se dhakka mara," chal raha hoon na yaar.. dhakka kyun maar raha hai.." aur fir Ritu ko ghoorte huye iss andaj mein uss'se bhi aage badh gaya jaise wo unka nahi, uska ghar ho...

"aa jayiye.. aap andar baithiye.. main abhi aati hoon..!" kahkar Ritu upar bhag gayi...

"tu itna chilla kyun raha tha bey? mera patta saaf karwana hai kya?" Rohan ne andar jakar sofe par baithte hi Ravi ko kosa....

"achchha.. tujhe mera chillana sun gaya.. uska nahi suna kis tarah meri ijjat taar taar kar rahi thi.. fir mujhe uske hath mein tera fone dikh gaya.. mainitna sunahara mouka kaise jane deta.. he he he!" Ravi ne hanste huye apni chhati choudi kar li...

" theek hai yaar.. par hum yahan Neeru ke liye aaye the.. bhool gaya kya?" Rohan ne shant hote huye kaha....

"oh teri.. main toh sach mein hi bhool gaya tha.. sorry yaar.. aree.. hum toh ghar ke andar aa gaye.. dekh!" Ravi sofe se uchhal pada....

"chup.. koyi aa raha hai.." Rohan ke kahte hi dono shant ho gaye....

aur Neeru ke kamre mein kadam rakhte hi Rohan sudh budh khokar khada ho gaya aur usko apalak dekhne laga.. halanki wo iss pari ko pahle dekh chuka tha.. par ab ki toh baat hi dusri thi... patiyala hulka neela kadhayi wala suit daale huye wo sachmuch kisi pari se kam nahi lag rahi thi.. uske ang ang se najakat tapak rahi thi... Rohan ka man mayur thirak utha.. hushn aisa ki kurbaan hone ko dil kare.. fir Rohan toh usko dekhne se pahle hi apna maan chuka tha.. iss aseem khushi ko sahan nahi kar pa raha uska dil balliyon par aa tanga..

Dheeme dheeme kadmon se najarein jhukaye huye wo chalkar unke paas aayi aur jaise hi jhuk kar usne tray table par rakhi.. reshmi baalon ki ek lat uski aankhon ke saamne ludhak aayi...

khadi hokar usne apni lat ko kaan se pichhe le jate huye madhur aawaj mein aagrah kiya..," baithiye na...!"

Rohan toh khada hokar jaise baithna hi bhool gaya.. apalak usko dekhte huye bola," Ji.. thanx!" par khada hi raha...

"arey.. baithiye toh sahi.. thanda lijiye...!" Neeru ne usko fir toka....

"ji.. baith raha hoon..!" Neeru ke chehre par baras rahe soundarya ke anupam noor mein Rohan iss kadar kho gaya tha ki iss baar bhi khada hi raha... Ravi ne uska hath pakad kar kheench liya.." baith ja yaar...!"

"oh haan..!" Rohan Neeru ke mohpash se jaise abhi mukt hua...

"aap lijiye hum aate hain.." Kahkar Neeru jane lagi....

"aap hi Neeru bh.. ji hain na..!" Ravi ke munh se bhabhi ji nikalta nikalta rah gaya..

Itna sunte hi Neeru chounk kar palti...," aapko mera naam kaise maloom? ye naam toh koyi leta hi nahi.. yahan par.. bachpan mein tha mera ye naam...!" Neeru ne achraj se Ravi ke munh ki aur dekha....," Mera naam ab Sheenu hai.. pls dobara wo naam mat lena....

"dekh lo ji.. hain na ham kamaal ke.. hum toh aapke pichhle janmon ki baat bhi jaante hain...!" Ravi ne muskurate huye kaha...

Neeru ne iss baat ko majak mein liya.. Ravi ke majak ko ijjat dene ke liye hulka sa muskurayi aur bahar nikal gayi....

"kaisi lagi bhabhi ji?" Uske jate hi Ravi ne Rohan ke kandhe se kandha bhidaya...

"ye toh maine kabhi sapne mein bhi nahi socha tha yaar... itni sundar ladki maine aaj tak nahi dekhi..!" Rohan saatwein aasmaan par tha....

"dekhi kyun nahi? uss din bus mein nahi dekhi thi kya?" Ravi ne yaad dilaya...

"haan par.. uss din maine iss najar se nahi dekha tha yaar.. bus ek pal ke liye hi najrein thahri hongi iss par...!" Rohan ne apni baat bhi poori nahi ki thi ki Ritu aur Neeru dono kamre mein aa gayi," ye lijiye aapka fone..!"

"thanx.." fone lete huye jaise hi Rohan ki ungaliyon ne Neeru ke hath ko sparsh kiya.. uske dil ke sabhi taar mano jhanjhana uthe.. itna jadu tha uske hathon mein...

tabhi Ritu bharbharati huyi bol padi," hamne chori nahi kiya tha.. seat ke neeche pada tha.. hamne socha sardar ji ka hoga.. hamne wahin driver ko bhi dene ki sochi thi.. par hamein laga ye theek nahi.. jiska bhi hoga wo fone toh karega hi.. tabhi usko bata denge.. ghar aakar dekha toh iski battery dead ho chuki thi.. hamare paas charger bhi nahi tha iska... chaho toh auntiji se poochh lena.. hamne aate hi unko bata diya tha...."

"oho.. aap toh dil pe le gayi.. aapko pata hai na ki meri majak karne ki aadat hai.." Ravi kahkar muskurane laga....

"tumse koun baat kar raha hai?" Ritu ne gusse se kaha toh Neeru hans padi...

"theek hai.. thanx.. hum chalte hain.." kahte huye Rohan uth khada hua...

Bahar nikalne se pahle Rohan ne mudkar dekha.. par Neeru toh usko chhodne bahar tak bhi nahi aayi.. wah dusri aur munh kiye seedhiyan chadh rahi thi.....


"Ab kya iraada hai boss?" Sari kahani badi dilchaspi se sun'ne ke baad Aman ne Rohan se poochha....

"Irada kya hona hai.. uske saamne baar baar jana hai.. uske dil mein utar kar apna banana hai aur sath chalne ke liye manana hai.. aur kya?" Rohan ne chahakte huye jawab diya....

"Matlab aaj se tu poora ladkibaaj ho jayega.. he he he!" Ravi ne jumla thonka...

"Ladkibaaj nahi.. Neerubaaj bol.. maine aaj tak kisi ladki ke baare mein aisa waisa socha bhi hai.. bata?" Rohan ne jakar uski gardan pakad li...

"chhod saa... jaan lega kya?" Ravi apne aapko chhudate huye bola," toh kounsa teesmaarkha ban gaya tu.. tere upar marne wali ladkiyan tujhe 'nalla' samajhne lagi hongi ab tak haan.. ha ha ha!" Ravi tali bajakar hansne laga...

"meri sharafat ko koyi nallagiri samjhe toh samjhe.. main toh shuru se hi maanta aaya hoon ki agar aadmi apni biwi se wafa ki ummeed karta hai toh usko bhi toh uske liye wafadaar hona chahiye.. intjaar karna chahiye...!" Rohan ne tark diya...aur charging par lagaya hua apna fone on kar liya....

"ek dam solid baat boli Rohan bhai.. par ladkiyan kahan kunwari rahti hain aaj kal.. shadi se pahle hi bhonpu baj jata hai bahuton ka.. tu kismat wala hai jo tujhe Neeru mil gayi..!" aman ne bhi bahas mein taal thonki...

"Abhi kahan mil gayi yaar.. abhi toh sirf dekha hai.. kahani lambi chalegi lagta hai!", Shekhar ne patakshep kiya...

"humm.. don't worry Rohan.. jab tak tumhe manjil nahi mil jati.. tum yahin rahoge.. mehmaan bankar nahi.. apna ghar samajhkar.. main jara bahar jakar aata hoon.. enjoy karo..!" Kahkar Aman khada ho gaya...

"aur main? main kahan rahunga...!" Ravi ne majak kiya...

"Tum Salma ki baahon mein raho yaar.. mera uss'se man bhar gaya hai.. bahut pakati hai sali.. usko sambhalo tum.. aaj bhi aane ko bol rahi hai.. bula loon?"

"bula lo yaar.. nek kaam mein deri kaisi? he he he" Ravi ne taal se taal thonki...

Aman bahar nikla hi tha ki Rohan ka fone baj utha.. Nitin ka no. dekh Rohan ne fone utha liya," Haan.. bhai.. wo Neeru mil gayi..!"

"whhhat? kya bakwas kar rahe ho yaar..? ye kaise ho sakta hai..?" nitin ki fati huyi si aawaj fone par ubhari....

"haan bhai sach mein... maine usko dekh bhi liya hai.. jaisa usne mujhe sapne mein bataya tha.. bilkul usi jagah par hai uska ghar...!" Rohan romanchit sa ho utha...

"mujhe yakeen ho gaya hai ki iss sapne ke chakkar mein apni jindagi barbaad kar loge... maine bataya toh tha ki sab kuchh Shruti ka kiya dhara tha.. aur Neeru naam ki hajar ladkiyan dikha sakta hoon mein.. kya naam ke chakkar mein tum kisi bhi Neeru ko apna sab kuchh sonp doge....?" Nitin ka ishara uski jaydaad ki aur tha...

"par bhai wo bahut sundar hai.. itni pyari hai ki.. bus.. aur naturewise toh aur bhi khas hai.. aur..." Rohan kuchh bol hi raha tha ki nitin ne beech mein hi tok diya," Main wahin aa raha hoon.. Shruti bhi mere sath hi aa rahi hai..!" Nitin ne kaha....

"kya? par yahan kaise? ... aur wo Shruti kaise aa gayi...? tum log rahoge kahan?" ek hi saans mein aascharyachakit Rohan ne sawalon ki jhadi laga di....

"jahan tu rahega wahan hum nahi rah sakte kya? baki baatein aane ke baad bataunga.. hum kal subah nikalenge.. ghar se kuchh lekar aana hai na..?" Nitin ne jaldi mein kaha....

"haan bhai.. mera purse lete aana.. jaldi mein main ghar hi bhool aaya.. mere ATM wagairah sabhi kuchh usmein hai.. aur haan.. 5-7 dress lete aana.. par Shruti kaise aa sakti hai bhai.." Rohan ki samajh mein kuchh nahi aa raha tha...

"bola na yaar.. sabkuchh aakar bataunga..!" Nitin ne kahte hi fone kaat diya....

Shruti uske sath hi baithi thi..."Mujhe bahut darr lag raha hai.. bapu ko agar ye pata chal gaya ki college se koyi tour nahi ja raha toh?" Shruti ka dil baitha hua tha.. Nitin ne sath chalne ki baat jab se kahi thi.. wah andar hi andar ghut rahi thi..

"kyun bewajah apna dimag kharab kar rahi hai..? iska tujhe Batala mein bahut use karna hai.. le.. tera gaanv aa gaya.. bhoolna mat.. kal subah 8:30 par.. yahin.." kahte huye nitin ne uski jaanghon par chikouti kaat li... Shruti jaise ro hi padi thi.. par aansuon ko usne siskiyan na ban'ne diya... chupchap gadi se utari aur apne ghar ki aur chal padi.. bhari bhari kadmon se...


Aman shahar ke beechon beech dheere dheere gadi chalate huye aage badhta ja raha tha.. Uske man mein rah rahkar rohan ke ajeeb se sapne ko lekar khayal aa rahe the.. aur sapna bhi aisa jo sach ho gaya... poorvajanam hota hai.. ye usne bahuton se suna tha.. par isko sakshat sach hota huaa wo pahli baar hi dekh raha tha.. Usko Rohan ki kismat par naaj tha aur isiliye shayad uss'se lagaav sa bhi ho gaya tha.. yaadon ke bhanwar mein uljhe Aman ko achanak apne pahle pyar ki yaad aa gayi aur barbas hi uski aankhon se aansoo chhalak uthe.. kitni pyari thi wo! ek dum phool si najuk.. dono ko ek dusre se pyar ho gaya tha.. par ikraar kabhi nahi kar paye.. wo usko dekh kar rah jata.. aur wo usko dekh kar rah jati.. ghar ki munder par khade hokar ghanton ek dusre ko niharte rahne ka silsila ekdum band ho gaya.. uss din Aman raat hone tak wahin khada raha tha.. agle din jab usko pata chala ki 'wo' apne maa baap ke sath shahar chhodkar chali gayi hai toh aman tadap utha.. 2 din tak khana bhi nahi kha paya.. kam se kam bata toh deti... par ho bhi kya sakta tha.. wo usko rok thode hi leta.. aakhir umra hi kya thi unki uss waqt.. par pyar umra dekhkar thode hi hota hai.. 'wo' toh bus ho jata hai.. kahin bhi.. kisi se bhi.. achanak!

Achanak Aman ne gadi side mein roki aur ek photocopy nikal kar padhne laga...
------------------------------------------------------------------------
"Hi Aman!

Jis din tumne mujhe pahli baar chhat par khade dekha tha.. shayad pahli baar dekha tha... par maine pahli baar nahi.. main toh tumhe kitne hi dino se gali mein cricket khelte huye dekhti aa rahi thi.. apne ghar ki khidki se tumhe chhat par khade ho patang udate huye dekhti aa rahi thi... patang udate huye tum jab bhi pichhe hat'te huye bilkul munder ke paas aa jate the toh mera nanha sa dil dhadak uthta tha.. kahin tum gir na jao.. mera tumhe pukar kar wahan se hat jane ke liye kahne ko man karta.. par kabhi aawaj hi nahi nikal payi.. tumhara naam lena shayad mere vash mein tha hi nahi.. aur shayad meri kismat mein bhi nahi...

tumhe yaad hai ek baar uncle ne tumhe tumhari chhat par aakar chanta lagaya tha.. (pata nahi kyun) tum toh sirf roye the.. par meri cheekh nikal gayi.. meri mummy doudi huyi aayi thi chhat par.. kya batati unko?

saal poora hone ko hai.. tum roz chhat par aate ho.. par hamesha mujhse late. hamesha main hi tumhara intjaar karti huyi milti thi.. hai na? kayi baar toh tum aadha aadha ghanta intjaar karwa kar aate.. mera tumse roothne ko man karta.. par fir manaata koun? tumhe dekhkar hi itna sukoon milta tha ki har roz neeche jate hi agle din ki sham ka intjaar karna mushkil ho jata tha.. tumse milne ko itni tadap rahi thi ki sote huye takiya sir se nikal kar seene par chipka leti thi.. par tumhara seena kabhi uss 'takiye' ki jagah nahi le paya...

kitni hi baar tumhare aage se gujari.. par tumne roka hi nahi.. kitni hi baar jaanboojh kar tumhari batting ya balling ke time wickets ke beech jakar khadi huyi.. par kabhi tumne toka hi nahi...

Tumhe yaad hai jab ek din hum dono ek hi colour ki shirt pahan kar chhat par aa gaye the toh dono kitna hanse the..? colour yaad hoga na? uske baad tumhari sabhi shirts ke colour maine yaad kar liye the.. roz sochkar pahanti aur upar aati ki tumne shayad yahi colour daal rakha ho.. par uske baad kabhi colour nahi mile.. ek din tumhare upar aate hi main bhag kar neeche gayi thi.. pata hai kyun? tumhari shirt ke colour ka suit daalne.. he he..

tum aaj sham aaye hi nahi chhat par.. aaj toh tumhara aana sab se jyada jaroori tha.. aaj main tumse kuchh bolna chahti thi.. pahli baar.. aur shayad aakhiri baar bhi.. par meri kismat mein shayad tha hi nahi.. ek baar tumse bolna.. tumahara hath pakad kar rona.. aur batana ki aankhon hi aankhon mein tum mere kya ban gaye ho....

main kal ja rahi hoon.. hamesha ke liye.. papa ka transfer ho gaya hai.. ab chhat par najar nahi aaoongi kabhi.. par tumhe bhool bhi nahi paaungi.. tum bhi nahi bhoologe na?

tum subah der se uthte ho.. isiliye letter tumhare dost babloo ko dekar jaaungi.. ummeed hai wo tumhe de dega..

kabhi bol nahi payi tumse.. bolne ka bada man karta tha.. kabhi mil nahi payi.. milne ka bada man karta tha.. kabhi kah nahi payi.. kahne ka bada man karta tha.. I Love You!

main bilkul bhi nahi ro rahi.. tum bhi rona mat please!

Tumhari,
(naam mit gaya tha.. shayad aansuon ne mita diya,)
----------------------------------------------------------------------

Aman kagaj ko wapas purse mein rakhte huye muskura utha.. par uski aankhein toh chhalak aayi thi.. muskurahat shayad bebas aankhon ko dilasa dene ke liye hi aayi hogi...

aankhon se aansoo ponchhte huye jaise hi wo govt. college ke saamne se gujra, uski najar babblu par pad gayi," oye babblu!" aman ne chillakar usko pukara..

Babblu bhaga hua uske paas aaya aur khidki kholkar gadi mein baith gaya," kya chakkar hai yaar.. aajkal andar hi andar rahta hai?"

"tu bata pahle? yahan ladkiyon ke college ke gate par kya kaam hai tera.. noukri maangne aaya hai kya?" Aman ne majak kiya...

"Arey noukri karein hamare dushman.. main toh line maar raha hoon... he he!"

"kis par.. koyi de rahi hai kya..... line?" aman hansa...

"de degi yaar.. main toh apna karm kar raha hoon.. dena dilwana toh prabhu ke hath mein hai.. kya pata kis ghadi kisi najneen ko taras aa jaye.. meri bhari jawani par... he he he.. bata na.. kahan ja raha hai?" Babblu ne aakhir mein poochha...

"oh teri bhari jawaaani.. kahin chalkar aana hai.. tere karm toh fir bhi hote rahenge.. chalein?" Aman ne poochha...

"chalo yaar.. kabhi tujhe mana kiya hai?" Babblu ne bahar nikal kar waqar ko pukara," meri gadi le jana bhai.." fir baithkar khidki band kar li aur gadi chal padi.....

b:if cond='data:view.isPost'>                                                                   

If you want to comment with emoticon, please use the corresponding puncutation under each emoticon below. By commenting on our articles you agree to our Comment Policy
Show EmoticonHide Emoticon

हमारी वेबसाइट पर हर रोज नई कहानियां प्रकाशित की जाती हैं